Орхонтуул сумын
ИТХ-аас санаачлан баталсан сумын иргэн бүр нэг мод тарьж ургуулах “Амьдралын төгөл”
хөтөлбөрийг хэрэгжүүлэх ажлыг 2015 оны 05 дугаар сарын 09-ний өдрөөс эхэллээ.
Энэхүү
хөтөлбөрийг сумын нийт иргэдэд сурталчлан таниулах, иргэдийн идэвх зүтгэлийг
энэ зүгт хандуулах ажлыг сумын ЗДТГ-аас аяны хэлбэрээр зохион байгуулан энэ
ажилд сумын нийт төр, төсвийн байгууллагуудын ажиллагсад идэвх санаачлагатай
оролцсон.
Орхонтуулчууд
бид насан туршдаа хэрэгжүүлэх энэ ажлын эхний шатанд сумын иргэд, нийт төр,
төсвийн байгууллагын албан хаагчид гэр бүлээрээ оролцсон ба үүнд 130 өрхийн 300
гаруй иргэн хамрагдаж, 1200 навчит, 1000 шилмүүст, нийт 2200 модны суулгацыг сумын
төв болон Рашаант тосгоны төв зам дагуу тус тус тарьсан байна. Цаашид модоо
тариагүй иргэд тарьж ургуулах ажил хийгдсээр байх болно.
Амьдралын
төгөл хөтөлбөрийн онцлог нь иргэд өөрсдийн санхүүжилтээр модоо тарьж, тарьсан
модоо арчилж ургуулах, хамгаалах ажлыг насан туршдаа хийх бөгөөд хэрэв тарьсан
мод нь өөрсдөө арчилж тордоогүй услаагүй шалтгаанаар ургаагүй тохиолдолд нөхөж
2 мод тарих ёстой юм.
Мод
тарих нь хүний насан туршдаа хийвэл зохих 3 үйлийн нэг байдаг гэдэгчлэн байгаль
эх дэлхийгээ хайрлан хамгаалах, нөхөн сэргээх, ногоон байгалиа унаган хэвээр
хадгалж ирээдүй хойч үедээ өвлүүлэн үлдээхэд хүн бүрийн хувь нэмэр үнэтэй.
Монгол
Улсын Үндсэн хуулинд заасан иргэний журамт үүргээ ёсчлон биелүүлэхэд Орхонтуул
сумын нийт иргэд идэвх санаачлагатай оролцож, сумынхаа өнгө төрхийг чимэх, ногоон
байгууламжийг нэмэгдүүлэх ажилд манлайлан оролцож, бүх нийтээрээ мод тарьцгаан
амьдран буй орчиндоо амьдралын төгөлөө байгуулцгаая хэмээн уриалж байна.