Сумын ИТХ-ын дэргэдэх Улаан Загалмайн Анхан шатны хорооноос 2018.11.07-ны өдөр хүмүүнлэгийн үйл ажиллагаа зохион байгууллаа. Аймгийн УЗХ-ны дарга Б.Түвшинжаргал хүрэлцэн ирж энэхүү үйл ажиллагаанд оролцлоо.
      Тус сумын Баянцогт 2-р багийн нийгмийн тусламж дэмжлэг шаардлагатай байгаа П.Энхчимэг нарын 6 өнчин хүүхдэд туслах сайн санааны үйл хэргийг 2-р багийн малчин Л.Ганзоригийн гэр бүл дэмжин 1 сая төгрөг, 3 бог мал хандивлаж, эд материалын болон сэтгэл санааны дэмжлэг туслалцаа үзүүлсэн юм.
      Мөн сумын ИТХ-ын зүгээс түлээ нүүрсний асуудлыг хөнгөлөлттэй нөхцлөөр шийдвэрлэх талаар сумын дулааны байгууллагууд, ойн эрх бүхий хөрш зэргэлдээ сумын удирдлагуудтай ярилцаж тохироод байна.
      Мөн Л.Ганзориг түүний гэргий Д.Азжаргал нар Улаан Загалмайн ивээн тэтгэгч, Онцгой гишүүнээр элсэж, хүмүүнлэгийн байгууллагатай хамтарч ажиллахаа илэрхийллээ.
      Улаан Загалмайн онцгой гишүүний татварыг 3 жил дараалан төлж, хүмүүнлэгийн үйл хэрэгт байнгын дэмжлэг үзүүлэн ажилладаг Баянцогт 2-р багийн малчин Н.Балдоржийг МУЗН-ийн "Нигүүлсэл" мөнгөн медалиар шагналаа.
     Сайн үйлс мөнхөд дэлгэрч байх болтугай.